2 Raja-raja 24

Iatonna linona Yoyakim ke’de’mi tu Nebukadnezar, datu Babel, male lako, anna mengkanorong tu Yoyakim tallung taun lako kalena; apa undinnato tibalikomi tu penaanna, anna balii.

Nasuami PUANG tu surodadu to Kasdim sia surodadu to Aram sia surodadu to Moab sia surodadu to Amon la ullaoi Yoyakim; iatu tau iato mai Nasua Puang la ullaoi Yehuda sia ussanggangi, susi kadanNa PUANG tu Napokada nalopian taunNa, iamotu mintu’ nabi.

Tonganna iate mintu’na te urrampoi Yehuda susi kadanNa PUANG, la ussabu’i tu tau iato mai dio mai oloNa, tu belanna mintu’ kasalan napogau’ Manasye;

sia belanna diona rara to tang sala tu napatibollo, belanna umponnoi Yerusalem tu rara to tang sala. Anna mengkailing PUANG umpagarri’i.

Iatu tang dipokadannapa tu mintu’ tuna’na Yoyakim sia mintu’ apa napogau’, tang tisura’moraka lan sura’ ossoranna mintu’ datu Yehuda?

Iatu Yoyakim tamamo batu dilobang dipasola nene’ to dolona, anna Yoyakhin, anakna muane, dadi datu ussondai.

Tae’mo natolei tu datu to Mesir tassu’ lan mai tondokna, belanna naala nasang datu to Babel tu mintu’ tondok naala lili’na Mesir randuk dio mai salu’-salu’ Mesir sae lako salu Efrat.

Iatu Yoyakhin sangpulo karuamo taunna tonna dadi datu, anna ma’parenta tallung bulan dio Yerusalem. Iatu indo’na disanga Nehusta, anakna Elnatan dio mai Yerusalem.

Napogau’mi tu apa kadake dio pentiroNa PUANG, susitu penggauranna ambe’na.

Attu iato ke’de’mi tu surodadunna Nebukadnezar, datu Babel, ullaoi Yerusalem; napatama limbumi tau tu tondok iato.

Sia Nebukadnezar kalena, datu Babel, sae ullaoi tu tondok iato, tonna marassan umpatama limbui mintu’ surodadunna.

Malemi tu Yoyakhin, datu Yehuda, umpennoloi datu Babel, la ia, la indo’na, la pangulunna, la arungna, la to mase’ponna. Natingkanmi datu to Babel, tonna taun ma’pengkarua kadatuanna.

Naalaimi inde to dio mai tu mintu’ pareanan lan banuanNa PUANG sia lan tongkonan layuk; sia nata’takki tu bulaan dio mai mintu’ pareanan tu nagaragai Salomo, datu to Israel, lan banua kabusunganNa PUANG, susi kadanNa PUANG.

Napali’mi tu mintu’ pa’tondokan Yerusalem sola mintu’ arung sia to malinta’ parari, sangpulo sa’bunna, susi duka tu mai pande sia pande bassi; moi misa’ tae’mo torro, sangadi to mase-mase mannamo dio lu to buda lan tondok.

Sia napali’ tu Yoyakhin lako Babel; ia duka tu indo’na datu sia iatu mai bainena datu, sia mintu’ to mase’ponna sia mintu’ to paa lan tondok nabaa nasang dio mai Yerusalem lako Babel.

Sia napali’ datu Babel lako Babel tu to malinta’ parari-pitungsa’bu, sia to pande sia to pande bassi – sangsa’bu – mintu’nato, to barani sia lalong parari.

Naangka’mi datu Babel tu Matanya, pa’amberanna Yoyakhin, dadi datu, la ussondai, anna gantii Zedekia.

Iatu Zedekia duangpulo mmisa taunna tonna dadi datu; anna ma’parenta sangpulo misa taunna dio Yerusalem. Iatu indo’na disanga Hamutal, anakna Yeremia dio mai Libna.

Napogau’mi tu apa kadake dio pentiroNa PUANG susitu mintu’ penggauranna Yoyakim.

Belanna kasengkeanNa PUANG, anna sakerangngan-rangnganna tu kakadakeanna Yerusalem sola Yehuda, sae lako Nasualei dio mai oloNa. Pabali-balimi Zedekia lako datu Babel.